Policia e Kosovës ka konfirmuar se “ka pasur paraqitje të dorëheqjeve” nga ana e punonjësve policorë serbë në drejtorinë rajonale të Policisë në Mitrovicën e Veriut.

Përmes një komunikate për media, Policia thotë se megjithatë kanë kapacitete për menaxhimin e situatës së krijuar, raporton Gazeta Express.

Komunikata e plotë:

Referuar zhvillimeve aktuale ju informojmë se edhe sot ka pasur paraqitje të dorëheqjeve të punonjësve policorë të komunitetit serb në pjesën e veriut të vendit, në zonën e drejtorisë rajonale të Mitrovicës Veri.

Njoftimet e tyre për dorëheqje janë bërë në rajonet dhe stacionet policore, ku disa prej tyre deri më tani i kanë dorëzuar pajisjet e tyre, për të vazhduar me kompletimin e procedurave tjera të parapara.

Policia e Kosovës ka kapacitete për menaxhimin e situatës dhe rrethanave të krijuara, të gjitha veprimet do ti ndërmerr konform autorizimeve ligjore dhe kushtetuese, konform vlerësimeve dhe planifikimeve operacionale, me qëllim të ruajtjes së rendit e qetësisë publike si dhe mbikëqyrjes dhe kontrollit kufitar.