Në sallën e Kuvendit të Komunës së Lipjanit, nën orgnaizimin e Qendrës Kosovare për Studime të Sigurisë (QKSS) dhe në bashkëpunim me Zyrën për të Drejtat e Njeriut në Komunën e Lipjanit është zhvilluar projekti Gjinia, Paqja dhe Siguria.

Me këtë rast, Nënkryetari i Komunës së Lipjanit, Diamant Bytyqi, ka thënë se fushata e diskutime kundër dukurive negative e sidomos kundër dhunës në familje janë të mirëserdhuna, sepse ngrisin vetëdijen rreth pasojave të dhunës ndaj grave dhe dhunës në familje, si dhe gjetjen e formave më të mira për adresimin e këtij problemi.

Nënkryetari Bytyqi po ashtu, ka potencuar se Komuna e Lipjanit ka themeluar Mekanizmin Koordinues kundër dhunës në familje në përbërje të të gjitha institucioneve, që trajtojnë këtë çështje, i cili mekanizëm ka për synim parandalimin dhe luftimin e dhunës në familje.

Gjatë diskutimit u paraqitën problemet e shumta që institucionet hasin në parandalimin e dhunës në familje, duke filluar nga kushtet ekonomike. Po ashtu u parashtrua nevoja për rritjen e komunikimit ndër-institucional me qëllim të parandalimit të dhunës në familje.

Shkaqet kryesore të dhunës, të identifikuara gjatë takimit ishin kushtet ekonomike, përdorimi i substancave narkotike dhe alkoolit dhe fëmijët të cilët rriten në ambiente ku dhuna në familje është e shprehur, ka njoftuar Komuna e Lipjanit.

Të pranishmit shprehën vullnetin e mirë për të luftuar bashkarisht në luftën kundër dhunës në familje.