Kryeministri Albin Kurti ka zhvilluar bisedë telefonike me të dërguarin e posaçëm të Mbretërisë së Bashkuar për Ballkanin Perëndimor, Sir Stuart Peach, me të cilin ka biseduar për për më shumë koordinim në politikën rajonale.

Siç bëhet e ditur nga një komunikatë për media, fillimisht, në emër të Qeverisë së Kosovës, Kurti i ka shprehur ngushëllime për ndarjen nga jeta të Madhërisë së saj, Mbretëreshës Elizabeta II.

Duke biseduar për Ballkanin Perëndimor, sipas komunikatës, është theksuar rëndësia për më shumë koordinim në politikën rajonale, me qëllimin e përbashkët për anëtarësim në Bashkimin Evropian dhe të forcimit të aleancës veri-atlantike, për paqe dhe siguri në rajon dhe më gjerë.

Kryeministri Kurti theksoi angazhimin e Qeverisë për t’u bërë pjesë e Programit Partneriteti për Paqe të NATO-s, derisa të bëhemi anëtar i plotë i NATO-s. Ndërsa lidhur me invazionin dhe agresionin ushtarak rus në Ukrainë, kryeministri potencoi se Republika e Kosovës ka bashkërenduar politikën e jashtme me Bashkimin Evropian, thuhet në komunikatë.

Duke biseduar pasojat ekonomike dhe energjike të agresionit rus, thuhet se Kurti e ka njoftuar emisarin Peach për masat e ndërmarra nga Qeveria, në mbështetje të qytetarëve, nëpërmjet Pakos së Ringjalljes Ekonomike, asaj për përballje me inflacionin si dhe masat e prezantuara të subvencionimit për efiçiencë të energjisë për qytetarët. /Telegrafi/