Arsenali dhe William Saliba duket se janë afër një marrëveshjeje për rinovim të kontratës.
Mbrojtësi francez nënshkroi me klubin nga “Emirates Stadium” në vitin 2019, por ai më pas pati disa periudha huazimi te Saint-Etienne, Nice dhe Marseille, përpara se të bëhej zyrtarisht pjesë e skuadrës së ekipit të parë këtë sezon, transmeton Gazeta Express.
Që në sezonin e parë me Arsenalin, Saliba ka treguar aftësitë e tij. Ai po vlerësohet si një nga futbollistët më të rëndësishëm, teksa është i pazëvendësueshëm në formacionin e Mikel Artetas.
Sipas gazetarit, Rudy Galetti, palët janë të vendosura për të vazhduar bashkëpunimin deri në vitin 2027, pasi 21-vjeçari vlerësohet si një nga lojtarët kyç nga Arteta.
Kontrata aktuale e tij skadon më 30 qershor 2024.
Falë paraqitjeve të tij të mira, William Saliba është ftuar nga Kombëtarja e Francës për ndeshjet e ardhshme në Ligën e Kombeve, kundër Austrisë dhe Danimarkës. /Gazeta Express/