Paulo Dybala ka arritur marrëveshje me Interin, teksa raportohet se kanë mbetur vetëm edhe disa detaje për t’u finalizuar e gjithë marrëveshja.

Sipas “La Gazzetta dello Sport”, argjentinasi ka rënë dakord për të nënshkruar kontratë katër-vjeçare me nënkampionët e Italisë, transmeton Gazeta Express.

Në marrëveshje thuhet se është përfshirë edhe opsioni për të vazhduar kontratën edhe për një vit të pestë.

Gjithashtu, palët thuhet se kanë rënë dakord edhe për pagën. Ish-futbollisti i Palermos do të fitojë 6 milionë euro (neto), pa përfshirë bonuset.

Kësisoj, Dybala te “Nerazzurrët” do të kalojë si lojtar i lirë, pasi kontrata e tij me Juventusin zyrtarisht skadon më 30 qershor, teksa lojtari ka konfirmuar kohë më parë se do të largohet. /Gazeta Express/