Deputetja e Aleancës për Ardhmërinë e Kosovës, Donika Kadaj – Bujupi, në emisionin “Info – Box” të RTV Dukagjinit, ka theksuar se vonesat në funksionimin e institucioneve po shkaktojnë dëme të mëdha për vendin.

Sipas saj, pushteti aktual e ka humbur legjitimitetin për të vazhduar më tutje për ta udhëhequr këtë qeveri, veçanërisht sipas saj, me aktvendimin e Gjykatës Kushtetuese për Asociacionin e komunave me shumicë serbe.

“Dihet se figura e presidentit parashihet të jetë figurë unifikuese dhe me kredibilitet të lartë, që shkon përtej partive politike. Kandidati i prezantuar (Hashim Thaçi) është krejt kundër këtyre parimeve”, ka theksuar Kadaj – Bujupi.

Ajo ka theksuar se ky Kuvend nuk ka legjitimitet të vazhdojë me mbajtjen e seancave, sepse e ka shkelur kushtetutën e vendit, duke shtuar “se presim që me 17 shkurt të përfundojë kjo qeveri”. /Telegrafi/