Përveç gjendjes së rëndë shpirtërore, kryefamiljarja L.B – nënë e katër vajzave jetime, ballafaqohet edhe me kushte të rënda të jetesës.

E ndërmarrësi pejan, Adnan Hyseni, sot ka qëndruar te kjo familje të cilën e ka ndihmuar me 350 euro ndihma ushqimore.

Gjithashtu ai u ka dhuruar një shumë prej 500 euro për nevoja tjera që i ka kjo familje.

Hyseni ka treguar se L.B nga Fushë Kosova, është njëra nga disa mijëra gra të cilat janë dhunuar gjatë luftës në Kosovë.

Adnani i emocionuar, në videon të cilën e ka postuar në Facebook, ka thënë se e ka marrë një letër falënderimi prej vajzës së L.B, për të cilën letër thotë se do të jetë më e shtrenjta e jetës së tij.

Ajo i ka thënë Adnanit se do ta përfundojë fakultetin dhe do t’i dal në ndihmë familjes së saj, përcjell Telegrafi.

Dhurata tjetër që e ka pranuar ai nga vajza e L.B, është edhe libri i shenjtë i myslimanëve – Kur’ani.

Hyseni ka kërkuar nga institucionet e Kosovës që t’i ndihmojnë këtë kategori të grave – gratë e dhunuara gjatë luftës, dhe të mos anashkalohen për shkak se jetës së vështirë që e kanë.

Ai sot ka qëndruar edhe në Shkup, respektivisht në fshatin Qajlan të Sarajit, ku i ka ndihmuar një familje e cila ka tre jetimë (pa baba dhe nënë) e të cilët jetojnë më gjyshin e tyre i cili përveç se është i shtyrë në moshë është edhe i verbër.

Adnani ua ka blerë orenditë kësaj familje, në vlerë prej një mijë euro. /Telegrafi/