Nga vërshimet në territorin e Komunës së Malishevës, sa vjen e po rëndohet gjendja. Të reshurat po shkaktojnë dëme të mëdha, e pothuajse të gjitha hyrjet daljet e qytetit janë bllokuar pas daljes nga shtrati të lumit Mirusha.

Përveç qytetit, në çdo fshat ka vërshime, por më problematike janë vendbanimet që shtrihen përreth lumit Mirusha.

Temeqina, Banja, Bellanica, Malisheva, Mirusha, janë vendbanimet më të rrezikuara, ku edhe ka shtëpi të bllokuara nga uji, si në Banjë, Mirushë, Temeqinë, Kërvasari.

Të gjitha ekipet emergjente dhe strukturat komunale janë terren duke u përkujdesur për të gjithë që kanë nevojë, transmeton Telegrafi.

Nga qyteti, ekipet e shpëtimit po i bartin qytetarët dhe nxënësit, pasi është e pamundur kalimi me këmbë apo automjete të vogla.

Po ashtu, shumica e bizneseve, që dyqanet e tyre i kanë në katet e para, janë dëmtuar nga vërshimi i ujit.

Deri më tani nuk është raportuar për dëme në njerëz, edhe pse ka raste të bllokimit nëpër shtëpi. /Telegrafi/