Kryetari i Komunës së Lipjanit, Imri Ahmeti, ka reaguar për herë të parë pas aksionit të Policisë së Kosovës në këtë komunë, ku u sekuestruan 400 kilogramë kokainë, raporton Express.
Ai me ironi ka thënë se në komunën që ai e udhëheq është e lehtë të bësh jetë, por jo edhe të kalosh transit.
Ai ka përgëzuar Policinë dhe akterët e tjerë të përfshirë në këtë aksion.
“Në Lipjan është e lehtë të bësh jetë, por nuk është e lehtë të kalosh transit! 😂p.s. I përgëzoj Policinë dhe akterët e tjerë për këtë aksion”, ka shkruar Ahmeti.
Ndryshe, Prokuroria Speciale ka njoftuar se ka bërë kërkesë për caktimin e masës së paraburgimit ndaj shtatë personave, të cilët janë ndaluar dje, lidhur me aksionin ku janë sekuestruar 400 kilogramë narkotikë të llojit kokainë. Ata dyshohen për tri vepra penale.
Specialja e ka bërë kërkesën për paraburgim nën dyshimet se të njejtit kanë kryer veprat penale: “Pjesëmarrja dhe organizimi i grupit criminal të organizuar”, “Posedimi i paautorizuar i narkotikëve, substancave psikotrope ose analoge”, dhe “Mbajta ne pronësi, kontroll ose posedim të paautorizuar të armëve”.
“Prokuroria Speciale ka bërë kërkesë për caktimin e paraburgimit të shtatë personave Prishtinë, 18 maj 2021 – Prokuroria Speciale e Republikës së Kosovës (PSRK), njofton opinionin se, sot ka bërë kërkesë në Gjykatën Themelore në Prishtinë, për caktimin e paraburgimit të shtatë (7) personave, të cilët janë ndaluar më 17 maj 2021, lidhur me aksionin ku janë sekuestruar 400 kg narkotikë të llojit kokainë”, thuhet në njoftimin e Prokurorisë Speciale.
