Progresi i arritur, forcimi i shtetësisë, subjektivitetit ndërkombëtar, si dhe proceset tjera të rëndësishme në politikën e jashtme kosovare, ishin temë diskutimi në takimin njohës mes ministrit të Punëve të Jashtme të Kosovës, Enver Hoxhaj, me ambasadoren e re të Republikës Federale të Gjermanisë në Kosovë, Angelika Viets, e cila i dorëzoi kopjet e letrave kredenciale.

Ministri Hoxhaj i uroi ambasadores Viets mirëseardhje në misionin e ri në Kosovë.

Ai ka veçuar angazhimin e fuqishëm të Qeverisë së Kosovës, për përmbushjen e agjendës integruese evropiane.

Ministri i Jashtëm kosovar, ka shprehur mirënjohjen e popullit dhe Qeverisë së Kosovës, për përkrahjen e Gjermanisë për Kosovën, me theks të veçantë në proceset integruese evropiane.

Duke vlerësuar lartë marrëdhëniet bilaterale ndërmjet dy shteteve, Hoxhaj theksoi vullnetin e Qeverisë së Kosovës për fuqizimin e mëtutjeshëm të shkëmbimeve me Gjermaninë, si një ndër partnerët kryesor strategjik të Republikës së Kosovës.

Ndërsa ambasadorja e Republikës Federale të Gjermanisë në Kosovë, Angelika Viets, theksoi vullnetin e Gjermanisë për fuqizimin e bashkëpunimit bilateral, duke shprehur angazhimin e saj të fuqishëm në këtë drejtim gjatë shërbimit të saj në Kosovë. /Telegrafi/