Ekipi mjekësor ushtarak nga Italia që do të ndihmojë vendin në luftën me pandeminë COVID-19, tashmë ka arritur në Kosovë, raporton Express.
Lajmin për Gazetën Express e ka konfirmuar dje zëdhënësja e Ambasadës së Italisë në Kosovë, Arjeta Halitaj.
Lexo Edhe:
Deputetja e PDK’së tregon se kur do ta propozojnë kandidatin për president
Ajo ka bërë me dije se shumë shpejt do të organizojnë një konferencë për media lidhur me këtë çështje.
“Ekipi i mjekëve sot ka mbërritur në Kosovë dhe shumë shpejt do të organizojmë një konferencë për media”, ka thënë Halitaj.
Ndryshe, ditë më parë, Ministri i Shëndetësisë, Armend Zemaj ka kërkuar nga Italia që të dërgojë profesionistë shëndetësor, veçanërisht mjekë të reanimacionit dhe anesteziologë për të ndihmuar vendin në luftën me COVID-19, raporton Express.
Zemaj kishte njoftuar se kanë bërë marrëveshje me palën italiane për sjelljen e disa mjekëve dhe kishte falenderuar Italinë për mbështetjen e vazhdueshme për Kosovën gjatë këtyre viteve.
“Kërkova që Italia të na ndihmojë duke na dërguar profesionistë shëndetësor, veçanërisht mjekë të reanimacionit, anesteziolog, që me përvojën e tyre të na mbështesin në këtë kohë të pandemisë. Javë më parë ne kemi bërë marrëveshje përkatëse me palën italiane për sjelljen e disa mjekëve në Kosovë për të ndihmuar në përballje me Covid19”, kishte shkruar Zemaj./Gazeta Express
