As vetë sulmuesi francez Karim Benzema s’e kishte imagjinuar se një ditë do të ishte në mesin e pesë golashënuesve më të mirë në histori të Real Madridit, rekord ky të cilin e arriti të enjten duke e kaluar Ferenc Puskasin.

Sulmuesi i shënoi dy gola në fitoren e Real Madridit me rezultat 3:0 kundër Valencias, përmes së cilës madrilenët e zvogëluan deficitin ndaj lideres së ligës, Barcelonës, sërish në dy pikë, transmeton Gazeta Express.

Me këto dy gola Benzema e arriti shifrën prej 243 golave të shënuara me fanellën e Real Madridit, duke e lënë kështu prapa vetes Puskasin (242), ndërsa mbetet prapa  Cristiano Ronaldos (451), Raulit (323), Alfredo Di Stefanos (308) dhe Santillanas (290).

Francezi, i cili u transferua në Real Madrid nga Lyoni në vitin 2009, ishte shumë i lumtur me këtë arritje të veten.

“Unë s’e kisha imagjinuar asnjëherë një gjë të tillë. Jam shumë i lumtur. Kam qenë duke punuar që një kohë të gjatë dhe gjithmonë e bëj punën e nevojshme për t’u përmirësuar”, ka thënë Benzema.

“Shpresoj se do të mundë të vazhdoj përpara. Jam shumë i lumtur që e kam mundësinë të luaj për këtë klub”. /Gazeta Express/