Chelsea e ka dërrmuar QPR-në me rezultat të thellë 7:1 në një ndeshje miqësore të dielën, duke treguar shenja të forta gatishmërie për t’u rikthyer fuqishëm në luftë për top katërshe në Premierligë, e cila nis këtë javë.

Ruben Loftus-Cheek, Billy Gilmour me nga dy gola dhe Mason Mount, Willian dhe Olivier Giroud me nga një sosh i ndihmuan skuadrës së Frank Lampardit të fitojnë bindshëm në Stamford Bridge, në vazhdën e përgatitjeve për rikthimin e Premierligës, transmeton Gazeta Express.

Loftus-Cheek nuk e ka bërë asnjë paraqitje garuese për Chelsean që prej sezonit të kaluar, për shkak se e kishte lënduar rëndë thembrën e Akilit në maj të vitit të kaluar.

Ndërkohë, titullar ishte edhe N’Golo Kante kundër ekipit nga Championship – kategoria e dytë e futbollit anglez – pasi iu rikthye stërvitjeve këtë javë.

Fitorja e djeshme e Chelseat vjen pas humbjes 1:0 kundër Reading në ndeshjen e kaluar në qendrën stërvitore Cobham në një ndeshje miqësore prapa dyerve të mbyllura.

Të kaltrit do ta rifillojnë sezonin në Premierligë të dielën që vjen me një ndeshje kundër Aston Villas në Villa Park.

Skuadra e Lampardit është e katërta në renditjen e Premierligës, me tri pikë më shumë se vendi i pestë – Manchester United. /Gazeta Express/