Rreth 3 mijë shtetas kosovarë të cilët kishin mbetur të ngujuar në shtetet e huaja janë kthyer në Kosovë gjatë pandemisë.
Lajmin e ka bërë të ditur Shefi i Kabinetit të MPJ’së, Kreshnik Ahmeti.
Sipas Ahmetit, brenda javës së ardhshme do t’i kthehen edhe mbi 700 qytetarë tjerë, teksa janë lehtësuar masat.
“Personat e riatdhesuar nuk do të futen më në karantinë, por pas kontrolleve mjekësore në Aeroportin Ndërkombëtar të Prishtinës, do të shkojnë në vetizolim në shtëpitë e tyre”, ka shkruar Ahmeti.
Ai ka bërë të ditur se deri në fund të javës së ardhshme, do të mbesin edhe rreth 400 kërkesa tjera emergjente për kthim, të cilat do të mund të realizohen deri kah mesi i qershorit.
“Si rezultat i angazhimit maksimal të Qendrës Operative të MPJD-së, misioneve tona diplomatike dhe institucioneve të tjera përkatesë të Qeverisë, ky proces i vështirë për të gjithë do të përmbyllet së shpejti”, thuhet në postimin e Ahmetit.
