Presidenti i Serbisë, Aleksandër Vuçiq ka reaguar pas vendimit të kryeministrit kosovar, Albin Kurti, që taksa të hiqet pjesërisht me 15 mars. Sipas tij, ky vendim i Kurtit është vetëm lojë dhe asgjë tjetër.

“Asnjë nga autoritetet shtetërore serbe nuk reaguan në lidhje me temën e heqjes së taksave sepse ne donim të shihnim atë që e tha z. Grenell. Ai ka absolutisht të drejtë dhe kjo është vetëm një lojë. Kurti t’ia shes këto hile dikujt tjetër”, është shprehur ai, transmeton Indeksonline

Ndryshe, i dërguari i posaçëm i Presidentit Trump për dialogun në mes të Kosovës dhe Serbisë, Richard Grenell i ka quajtur masa gjysmake paralajmërimet e Kryeministrit Kurti për heqjen e pjesshme të taksave në prodhimet e Serbisë dhe Bosnjës e Hercegovinës.

Nuk i përkrahim masat gjysmake të Kryeministrit Kurti. Qëndrimi ynë është shumë i qartë: taksat duhet të hiqen krejtësisht. Z. Kurti po bën gabim serioz – dhe kjo i është bërë e qartë Presidentit Thaçi sot në Shtëpinë e Bardhë.

Vlen të theksohet se Qeveria e Kosovës ka marrë vendim dje që tarifa për lëndën e parë që vjen në Kosovë nga Serbia dhe Bosnja, të hiqet nga data 15 mars.

Kurti, në një konferencë për media, ka deklaruar se si Qeveri e Kosovës, gjatë javës së ardhshme, do të marrin vendim, që nga data 15 mars 2020, të hiqet tarifa për lëndën e parë që importohet nga Serbia dhe Bosnja e Hercegovina.

“BE ta vlerësojë lart heqjen e tarifës duke ofruar liberalizimin e vizave para Samitit të Zagrebit. Nëse Serbia nuk e përfill qëndrimin e Kosovës dhe nuk fillon heqjen e barrierave, me fillim nga data 1 prill do të nisë zbatimi i reciprocitetit, njëherë me fushën e tregtisë e pastaj në fushën ekonomisë. Në rast se pala serbe nuk reflekton as pas një periudhe 90 ditësh për heqjen e tarifës për lëndën e parë, atëherë Qeveria nga data 15 qershor do ta kthejë tarifën, deri në zbatimin e reciprocitetit”, u shpreh Kurti.