Arsenali është treguar kundërshtar i fuqishëm për Manchester Unitedin duke e mposhtur me rezultat 3-0 në Emirates Stadium.
Topçinjtë ishin të pamëshirshëm në gjysmën e parë të lojës gjatë të cilës arritën që t’i shënonin të tre golat.
Goli i parë i vendasve u shënua që në minutën e gjashtë me protagonist Alexis Sanchez.
Nuk kaloi as një minutë dhe erdhi goli i dytë. Mesut Ozil ishte realizues (7’).
Alexis u përkujdes që t’ua bënte të pamundur rikthimin Djajve të Kuq duke shënuar golin e tretë për skuadrën dhe të dytin personal (19’).
Në fraksionin e dytë të lojës, Unitedi nuk arriti të bënte asgjë, ashtu që u largua kokulur nga Londra.
Në këtë mënyrë, të zgjedhurit e Louis van Gaal nuk janë më liderë në tabelë, pasi vendin e parë e ka okupuar sërish Manchester City.
Ndërkaq, Arsenali e ka marrë vendin e dytë në tabelë me pikë të barabarta me Manchester United, nga 16. /Telegrafi/
