Kuvendi i Komunës së Lipjanit, nën-udhëheqjen e Kryesuesit Daut Azemi, gjatë ditës së sotme ka zhvilluar punimet e seancës së 24-të me radhë, në të cilën janë shqyrtuar dhe aprovuar pikat e rendit të ditës të cilat ishin të propozuara për diskutim në këtë mbledhje.
Fillimisht drejtori për Gjeodezi Katastër dhe Pronë Sefer Tasholli, ka propozuar vendimin për shpalljen e interest publik për shpronësim të paluajtshmërive.
Ndërsa, Kryetari i komunës Imri Ahmeti ka paraqitur raportin e punës së Zyrës së kryetarit dhe Drejtorateve Komunale për periudhen Janar-Qershor, ku ka theksuar se duke u bazuar në parametrat matës gjatë peiudhës së parë të vitit 2019 tregojnë se do të përmbyllim edhe një vit të suksesshëm, duke u nisur nga të hyrat të cilat jemi të bindur se do e tejkalojmë planifikimin po ashtu edhe me shpenzimin e buxhetit besojmë që deri në fund të vitit do të jetë në nivelin e dëshiruar, ka thënë ndër të tjera Kryetari Imri Ahmeti gjatë shpalosjes së këtij raporti.
Po ashtu gjatë punimeve të këtij Kuvendi është raportuar edhe për shpenzimet e periudhës Janar –Shtator, njofton Komuna.
Ndërsa, asambleistët e Kuvendit të Komunës së Lipjanit, kanë shqyrtuar dhe aprovuar edhe Vendimin për organizimin e zgjedhjeve për zgjedhjen e këshillave dhe kryetarëve të këshillave lokale, propozim Vendimin për formimin e komisionit për koordinimin e procesit të zgjedhjeve të këshillave lokale, propozim Rregullore për ndryshimin dhe plotësimin e Rregullores për transportin e udhëtarëve me automjete taxi 15.Nr.011-29428 të datës 02.05.2019 si dhe propozim Vendimin për miratimin e planit orientues të punës së Kuvendit të Komunës së Lipjanit për vitin 2020.
