Philippe Coutinho do ta bartë fanellën me numrin 10 në Bayern Munich, të cilën deri tani e ka nderuar legjenda Arjen Robben.

Coutinho iu bashkua Bayernit zyrtarisht të hënën në mëngjes si lojtar i huazuar nga Barcelona për sezonin aktual, raporton Gazeta Express.

Tani, braziliani do të tentojë të bindë në Gjermani duke bartur fanellën me numrin 10, të cilën Robben e barti deri në pensionimin e tij këtë verë. Holandezi Robben u pensionua pas 10 vjetëve në Bayern, ku fitoi shumë tituj, përfshirë tripletën më 2013.

Në një komunikatë të publikuar në uebsajtin e klubit, Barça njoftoi se ka arritur marrëveshje me kampionin gjerman Bayern Munich për transferimin e mesfushorit brazilian si lojtar i huazuar për sezonin 2019/20.

Bayerni do t’ia paguajë Barçës 8.5 milionë euro për huazimin e tij, si dhe pagën e lojtarit në vlerë 12 milionë euro. Në bazë të marrëveshjes, bavarezët do ta kenë një opsion për ta blerë Coutinhon për 120 milionë euro në fund të sezonit.

27-vjeçari ka qenë dështim në Camp Nou duke mos i përmbushur pritjet që prej transferimit të tij nga Liverpooli në afatin kalimtar të janarit më 2018.

Ai i bëri vetëm 75 ndeshje në total, duke i shënuar 21 gola dhe 11 asiste. /Gazeta Express/