I kërkuari nga Real Madridi, Donny van de Beek, mund të qëndrojë në skuadrën e Ajaxit përkundër interesimit nga klubi i Zinedine Zidane, sipas trajnerit të kampionit të Holandës, Erik ten Hag.

Mesfushori 22-vjeçar veçse i ka konfirmuar bisedimet mes Real Madridit dhe Ajaxit për një transferim të mundshëm të tij, pasi që madrilenët nuk arrijnë ta transferojnë Paul Pogbën nga Manchester Unitedi, transmeton Gazeta Express.

Megjithatë, duket se holandezi Van de Beek do të mbetet në Amsterdam, pasi që fundi trajneri i Ajaxit tha se negociatat për një transferim të tillë nuk janë as afër kompletimit.

“Van de Beek ia dedikon veten vetëm ndeshjeve të futbollit”, ka thënë Ten Hagu para ndeshjes kthyese me PAOK-un. E para, në kaudër të rundit të tretë kualifikues në Ligën e Kampionëve, përfundoi me rezultat 2:2.

“Besoj dhe shpresoj se ai do të qëndrojë këtu me ne këtë sezon. Përndryshe, unë do të dëgjoj nga drejtori i futbollit i Ajaxit, Marc Overmarsit”.

Van de Beeku shkëlqeu në barazimin e Ajaxit me PAOK-un, në ndeshjen e parë në Selanik, përderisa ai ka arritur të kontribuojë me dy gola dhe dy asiste në dy ndeshjet e Eredivisie këtë sezon. /Gazeta Express/