Ole Gunnar Solskjaer është i vetmi kandidat serioz për të qenë trajner i Manchester Unitedit në sezonin e ardhshëm. Drejtuesit e “Djajve të kuq” nuk e kanë kontaktuar asnjë person tjetër për këtë pozitë.
Përkundër që Manchester Unitedi e kishte pasur qëllim ta emëronte një trajner më përvojë dhe famë, pas shkarkimit të Jose Mourinhos më 18 dhjetor, Solskjaer tani është favoriti për ta marrë këtë pozitë, duke i mposhtur deri më tani trajnerin e Tottenhamit, Mauricio Pochettinon, dhe atë të Juventusit, Massimiliano Allegrin, transmeton Gazeta Express.
As Pochettino e as Allegri nuk janë kontaktuar nga drejtuesit e Manchester Unitedit për ta marrë pozitën e trajnerit për sezonin e ardhshëm, për shkak që trajneri në detyrë, Solskjaer, ka bërë një punë të mrekullueshme deri më tani.
Solskjaer u emërua në pozitën e “Djajve të kuq” më 19 dhjetor, duke e lënë përkohësisht punën e tij si trajner i klubit norvegjez, Molde. Kontrata e norvegjezit me Manchester Unitedin është e vlefshme deri në maj të këtij viti.
Solskjaer i ka fituar 12 ndeshje dhe i ka barazuar dy të tjera, që kur u emërua në këtë pozitë. Disfata e tij e vetme erdhi në kuadër të 1/8 të finales së Ligës së Kampionëve, kur Paris Saint-Germaini fitoi me rezultat 2:1 në Old Trafford.
Ecuria e mirë e Manchester Unitedit ka bërë që ata ta mbyllin distancën prej 11 pikëve nga vendi i katërt dhe tani ata janë vetëm një pikë larg një pozitë kualifikuese për sezonin e ardhshëm të Ligës së Kampionëve.
Gjithashtu, Manchester Unitedi u kualifikua në çerekfinale të FA Cup, duke e eliminuar Arsenalin dhe Chelsean në rrethet paraprake. /Gazeta Express


