​Di Maria e zbulon zënkën me Van Gaalin, që i dha fund karrierës së tij në Man United

PUBLIKUAR

Angel Di Maria ka zbuluar detajet e fundit të karrierës së tij me Manchester Unitedit, duke rrëfyer për zënkën me trajnerin e atëhershëm të “Djajve të kuq”, Louis van Gaal.

Argjentinasi ishte transferuar në Old Trafford nga Real Madridi për një shumë që atëherë kishte qenë rekord në Premierligë, 68 milionë euro. Ai ishte transferuar gjatë afatit kalimtar të verës së vitit 2014 dhe paraqitjet e tij të para me fanellën e kuqe kishin qenë mjaft mbresëlënëse, transmeton Gazeta Express.

Mirëpo, forma e Di Marias pësoi një rënie drastike dhe ai përfundoi duke u larguar nga Manchester Unitedi vetëm një vit më vonë. Argjentinasi u transferua në Paris Saint-Germaini, pasi i shënoi vetëm katër gola në 32 paraqitje për Unitedin.

Ai kurrë më herët nuk e kishte komentuar në detaje lidhjen e tij me ish-trajnerin e tij në Manchester United, Van Gaal, mirëpo e ka bërë këtë gjë tani.

“Unë isha në Manchester dhe gjithçka ishte në rregull me Van Gaalin gjatë dy muajve të parë. Pas një zënke, gjërat kurrë më nuk ishin njëjtë. Lidhja mes nesh nuk ishte e njëjtë”, ka thënë Di Maria.

“Ajo zënkë ndodhi sepse ai gjithmonë i shfaqte gjëra të këqija dhe negative, të cilat më mbanin prapa. Një ditë, unë u zura me të. I thashë se nuk dua të shoh më gjëra të tilla, se isha duke luajtur mirë dhe e pyeta pse nuk po i tregon gjërat e mira”.

“Atij nuk i pëlqeu mënyra se si i fola dhe aty filloi i gjithë problemi”.

Van Gaal pastaj e shiti Di Marian në PSG për 50 milionë euro, verën e vitit 2015.  Për kampionin francez, ai i ka shënuar 59 gola në 166 ndeshje të zhvilluara deri më tani. /Gazeta Express/

 

SHIKO MË SHUMË

Shqipëria zbret sot në fushë, sfidë e rëndësishme ndaj Finlandës

Kombëtarja e Shqipërisë rikthehet sonte në aksion, në një tjetër sfidë të Ligës së...

Erdhi me shumë bujë, Maran e lë në tribuna edhe për ndeshjen ndaj San Marinos!

Shqipëria përballet sot me San Marinon, por trajneri Rolando Maran ka vendosur të lërë...

Vushtrria pret kampionin e Kosovës, këto janë formacionet

Vazhdon edhe sot java e 3-të në Superligën e Kosovës. Kampionët e Ligës së Parë,...