Skuadra zikaltër është befasuar në shtëpi, duke u mposhtur 0-1 nga Bologna, për ta zhytur edhe më shumë në krizë pasi Interi i Luciano Spallettit nuk shënon që tre ndeshje, që ka regjistruar dy humbje dhe një barazim, përfshirë edhe eliminimin nga Lazio në Kupën e Italisë.

Ishte Federico Santander ai që realizoi golin e vetëm dhe të tri pikëve për mysafirët në minutën e 32’, duke ia lëkundur kështu fort karrigen Spallettit, që mund të shkarkohet nga dita në ditë.

Pas ndeshjes, trajneri i Interit tha se lojtarët e tij duken “të frikësuar”.

“Ka disa gjëra që më kanë bezdisur, ndërsa për të tjerat, do ta analizojë ndeshjen të hënë në mëngjes përpara ekipit”, tha ai.

“Jemi të frikësuar. Kur ti humb një rast dhe kundërshtari shënon, gjithçka bëhet më e vështirë”.

“Nëse nuk ke një karakter të fortë, si historia dhe stadiumi i këtij klubi, atëherë do të vuash”.

“Duket qartë që ka diçka që na mungon, të tjerët luftojnë më tepër se ne”.

Ai foli edhe për vërshëllimat në stadium nga tifozët, sipas të cilit, “është diçka normale në futboll”.

“Vërshëllimat? Kam gjithë jetën që jetoj me to. Kur paguan për biletën, pret të shohësh diçka tjetër, sidomos nga një ekip me emrin Inter”.

“E ardhmja ime? Për mua nuk ndryshon asgjë”, shtoi Spalletti mes tjerash. /Gazeta Express/