Skuadra shqiptare, Kukësi ka kaluar në raundin e tretë në Ligën e Evropës, dhe do të ketë një përballje të vështirë me Legian e Varshavës.

Edhe pse skuadra polake, Legia, shihet si favorit absolut ndaj kuksianeve, vëmendja më e madhe pritet të jetë në tribuna.

Tifozët polak të Legias, njihen si racistë dhe nazistë, pasi shpesh herë kanë nxjerrë transparente kundër shqiptarëve më saktësisht Kosovës, transmeton Telegrafi.

Në disa transparente të tifozëve polak shkruhej ‘Kosova është Serbi’, dhe të njëjtit tifozë do të vijnë në Tiranë në ndeshjen Kukësi – Legia Varshavë.

Gazeta shqiptare ‘Sport Ekspres’,e ka ngritur e para alarmin për një sherr të mundshëm në rrugët e kryeqytetit shqiptar mes tifozëve polak dhe atyre shqiptar.

Polakët kanë ditur të bëjnë sherr edhe vite më parë në kryeqytetin italian Romë, në ndeshjen e Ligës së Evropës përballë Lazios, dhe ata kanë paralajmëruar ardhje masive në Shqipëri.

Mbetet të shihet nëse do të mund të bëjnë ndonjë gjë në Shqipëri, pasi shqiptarët njihen si mikpritës por edhe si njerëz dhe tifozë që ruajnë pronën e tyre dhe nuk lënë njeri për t’ia shkatërruar. /Telegrafi/