Drejtori gjeneral i Juventusit, Giuseppe Marotta, ka udhëtuar në Gjermani për të kompletuar shitjen e Arturo Vidalit te Bayern Munichu.

Mediat kanë raportuar se dy klubet kanë arritur marrëveshje që kiliani të shkojë në Allianz Arena për 36 milionë euro, ndërsa katër milionë të tjera do të paguhen në formë bonusesh.

Gazzetta dello Sport bën të ditur se marrëveshja është afër kompletimit dhe drejtori i Juves ndodhet në Munih për t’i qartësuar detajet.

Vidal thuhet se tashmë është pajtuar që të nënshkruajë për bavarezët dhe do të përfitojë 6.5 milionë euro për sezon.

Zonja e Vjetër do të përfitojë shumë nga shitja e lojtarit, të cilin e bleu për 10 milionë euro në vitin 2011 nga Bayer Leverkuseni. /Telegrafi/