Agjenti i Iker Casillasit sot ka dhënë një deklaratë bombastike duke pranuar se kapiteni legjendar i Real Madridit dëshiron të largohet nga klubi këtë verë.

E ardhmja e portierit 34-vjeçar është në dyshim, për shkak të dëshirës së madhe të klubit për ta transferuar portierin e Manchester Unitedit, David de Gean, teksa Keylor Navas ia ka vënë syrin pozitës së startuesit në Santiago Bernabeu.

Për këtë arsye, Casillas është dorëzuar dhe ka kërkuar nga klubi që ta lejojnë atë t’i bashkohet Portos.

“Casillas është shumë i ngazëllyer me mundësinë për t’iu bashkuar Portos. Ne shpresojmë që Real Madridi do ta lejojë atë që të largohet dhe t’i japë atij një dalje të lehtë”, ka thënë agjenti i portierit, Carlo Cutropia.

Përfaqësuesi i kombëtares spanjolle ka regjistruar mbi 700 paraqitje për Real Madridin në të gjitha garat, ndërsa kontrata e tij aktuale skadon në vitin 2017. /Telegrafi/