Zhgënjimi pas humbjes në shtëpi kundër ish-klubit të tij nuk ishte i mjaftueshëm për yllin francez të Manchester Unitedit, Paul Pogba, për të mos bërë fotografi duke buzëqeshur me futbollistët e Juventusit e kjo gjë i ka zemëruar tifozët e “Djajve të kuq”.
Menjëherë pas përfundimit të ndeshjes mes Manchester Unitedit dhe Juventusit, të cilën italianët e fituan me rezultat 1-0, Pogba u fotografua me një dhuratë nga Juventusi dhe me ish-bashkëlojtarin e tij, Juan Cuadradon, transmeton Gazeta Express.
Cuadrado, i cili kishte luajtur së bashku me francezin në klubin italian gjatë sezonit 2015/2016, e bëri publik këtë takim përmes një fotografie të cilin e postoi në llogarinë e tij në Instagram.
“Është gjithmonë ndjenjë e mirë të të shoh @paulpogba”, ka shkruar kolumbiani në mbishkrimin e fotografisë së postuar në Instagram pas përfundimit të ndeshjes mes këtyre dyve.
Cuadrado kishte luajtur për 81 minuta të ndeshjes për Juventusin, të cilët e vazhduan ecurinë e fitoreve në Ligën e Kampionëve, përmes golit të shënuar nga Paulo Dybala qysh në pjesën e parë. Ky gol ishte i mjaftueshëm për ta siguruar fitoren, dhe Juventusi mbetet në pozitën e parë të grupit H të Ligës së Kampionëve. /Gazeta Express/


