Qendërsulmuesi argjentinas dhe kapiteni i Interit, Mauro Icardi, i ka komentuar spekulimet për largimit e tij ng Zikaltrit, duke thënë se ai do t’i vlerësojë të gjitha ofertat, megjithatë e ka theksuar se është i lumtur në Inter.
Sulmuesi i Interit ka një klauzolë largimi prej 110 milionë eurosh në kontratën e tij me klubin, që është e vlefshme për klubet jashtë Italisë në dy javët e para të korrikut gjatë afatit kalimtar të verës, transmeton Gazeta Express.
Megjithatë, pas largimit të Cristiano Ronaldo nga Real Madridi, mediat e huaja kanë raportuar se presidenti i klubit madrilen, Florentino Perez, është interesuar për argjentinasin, pasi që beson se ai është zëvendësuesi i përsosur i portugez, i cili u transferua në Juventus.
Interi dëshiron t’ia rinovojë kontratën Icardit, e cila përfundon në fund të qershorit të vitit 2021, pasi që klubi dëshiron ose t’ia rritë këtë klauzolë të largimit ose të mos e përfshijë atë fare në kontratën e re, ku argjentinasit do t’i ofrohet edhe rritje page.
“Ka shumë spekulime. Kur ofertat do të vijnë, ne do t’i vlerësojmë ato, por unë jam shumë i lumtur këtu në Inter”, ka thënë Icardi, para ndeshjes të së mërkurës në Ligën e Kampionëve, kundër Barcelonës në Camp Nou.
Icardi ishte transferuar nga Sampdoria gjatë afatit kalimtar të verës së vitit 2013. Argjentinasi i kushtoi Interit vetëm 13.3 milionë euro. /Gazeta Express/


