Massimiliano Allegri pret që anësori i Juventusit, Douglas Costa, të vuajë suspendim të gjatë dhe konfirmoi se klubi do ta gjobisë atë për gjestin e shëmtuar ndaj lojtarit të Sassuolos në një ndeshje të Serisë A të dielën.
Douglas Costa u përjashtua me karton të kuq pasi e goditi me bërryl, pastaj me kokë para se të pështynte kundërshtarin dhe trajneri i tij pret që ai të ndëshkohet, transmeton Gazeta Express.
Costa pritet të suspendohet me të paktën tri ndeshje mos lojë. Allegri ndien se braziliani ra pre e provokimeve nga kundërshtari, por insistoi se kjo nuk do ta shpëtojë Costan nga gjoba që klubi do t’ia shqiptojë.
“Është e drejtë që ai të ndëshkohet dhe kështu do të ndodhë”, tha Allegri.
“U befasova me reagimin e tij. Pësuam gol, karton të kuq dhe suspendim që do të jetë i gjatë”, shtoi ai. /Express/
