Komuna e Lipjanit, për nder të 12 qershorit, ditës së çlirimit, së bashku me komunën e Shtimes, dhe (IKC), Initiative For Kosova Community, sot në sheshin “Adem Jashari” në Lipjan, ka hapur Panairin e Prodhimeve Bujqësore.
Në promovim të zhvillimit bujqësor, në kuadër të këtij panairi, nën organizmin e drejtorisë për Bujqësi, Pylltari dhe Zhvillim Rural të KL, u mbajt defilim i makinerisë bujqësore, ku mori pjesë edhe kryetari i komunës së Lipjanit, Imri Ahmeti me bashkëpunëtorë të tij.
Në këtë rast, kreu i Lipjanit, Imri Ahmeti, duke uruar ditën e çlirimit, tha se ndihet i privilegjuar që po e bënte hapjen e këtij panairi të prodhimeve bujqësore.
“ Ky panair, nga viti në vit po shënon suksese, duke e ngritur cilësinë e produkteve, si dhe kualitetin e punës që po e bëjnë fermerët tanë lipjanas”, ka thënë kryetari Ameti
Ndërkaq, në një fjalë rasti, në sheshin “ Adem Jashari” përfaqësuesi nga Shtimja, Bashkim Ahmeti, tha se ky panair i përbashkët, paraqet një realitet të zhvillimit të bujqësisë në dy komunat.
Në anën tjetër, Dorentina Kurteshi ( IKC), duke folur për panairin tashmë tradicional në komunën e Lipjanit , tha se, për dallim nga viti i kaluar, në këtë vit shihet një interesim më i madh i fermerëve, dhe uroi që bashkëpunimi të vazhdon edhe më tutje.
