Trajneri i Napolit, Carlo Ancelotti, dëshiron ta shohë Milanin të kthehet përsëri në majat e futbollit, me kushtin që të qëndrojë pas ekipit të tij.
Trajneri italian kishte kaluar tetë vite mjaft të suksesshme me ‘rosonerët’, duke fituar një herë Serie A-në dhe dy herë Ligën e Kampionëve para se të largohej në vitin 2009, transmeton Gazeta Express.
Tani që është kthyer përsëri në Itali, 59-vjecari po shpreson ta shohë ekipin e tij të mëparshëm të rikthehet si një ndër ekipet më të fuqishme në botë.
“Ka pasur shumë lëvizje prapa skenave në Milan. Shpresoj se ata do të mundë të sigurojnë pak qetësi për këtë klub të lavdishëm dhe fansat e tij. Shpresoj se do të rikthehen në majat e futbollit, por të qëndrojnë pak prapa Napolit,” është shprehur Ancelotti. /Gazeta Express/


