Ylli i Romës, Radja Nainggolan, e ka marrë me optimizëm faktin se skuadra e tij ia doli ta eliminonte Lionel Messin dhe Luis Suarezin dhe kërkon ta bëjë po të njëjtën gjë edhe kundër Liverpoolit në ndeshjen e kthimit gjysmëfinale në Ligën e Kampionëve të mërkurën.
Liverpooli e mposhti Romën 5-2 në “Anfield” në ndeshjen e parë gjysmëfinale javën e kaluar, por dy golat e shënuara si mysafir ia kanë dhënë gjigantit italian një fije shprese për ndeshjen e kthimit, transmeton Gazeta Express.
Klubit nga kryeqyteti italian tani i duhet një fitore prej 3-0 për ta eliminuar gjigantin anglez dhe për të kaluar në finale, një rezultat i ngjashëm si ai që i ishte dashur kundër Barcelonës në çerekfinale, të cilin Roma e arriti duke bërë histori në garën më të madhe evropiane për klube.
“E bëmë kundër Barcelonës – kundër [Lionel] Messi dhe [Luis] Suarez – dhe ata zor që bënë ndonjë goditje në drejtim të portës sonë”, tha Nainggolan.
“Do të përpiqemi të bëjmë edhe një moment tjetër historik siç e bëmë kundër Barcelonës. Kjo tregon se është e mundur edhe kundër Liverpoolit”, shtoi ai. /Express


