Deputeti i Kuvendit të Kosovës, Daut Haradinaj, ka paralajmëruar Komisionin për verifikimin e veteranëve të luftës së UÇK-së, se do t’i zvarrisin në shesh për mos-nxjerrjen e listave përfundimtare.

Ish komandanti i UÇK-së ka thënë se nuk do t’i nënshkruajë këto lista, pasi që jashtë tyre kanë mbetur një numër i madh i bashkëluftëtarëve të tij, transmeton Telegrafi.

“Anëtarët e komisionit për verifikimin e ish ushtarëve të UÇK-së, veteranët që do të jenë edhe më shumë, do t’i zvarrisin në shesh. Unë nuk do t’i nënshkruaj këto lista pa u fut krejt ushtarët e mi. Të gjithë veteranët e luftës kanë pasur kartela”, ka thënë Haradinaj në Klan Kosova.

Haradinaj ka thënë se “Rrafshi i Dukagjinit ka pasur më tepër ushtarë se Zona e Drenicës dhe se këtë e dinë edhe Sami Lushtaku dhe gjithë komandantët e UÇK-së. Ndërsa po del se Dukagjini ka më pak ushtarë se disa zona të tjera”.
Ndërkaq, ish kryetari i veteranëve të luftës, Muharrem Xhemajli, ka akuzuar komandantët për mos publikimin e listave përfundimtare dhe se veteranët e luftës duhet të ‘protestojnë në Drenicë dhe Dukagjin dhe jo para Qeverisë së Kosovës’.

Nga ana tjetër, Xhevdet Qeriqi, i cili ishte pjesë e debatit në Info Magazine, ka thënë se veteranët do të protestojnë në Prishtinë, sepse problemi sipas tij është këtu.

Ai ka akuzuar Muharrem Xhemajli se asnjëherë nuk mbrojti interesin e veteranëve por e keqpërdori pozitën për të mbrojtur interesa personale e partiake.

Në fund, Qeriqi, Xhemajli dhe Haradinaj kundërshtuan ashpër themelimin e Gjykatës Speciale.

Deputeti i AAK-së tha se do të punojë shumë që kjo gjykatë të mos themelohet, por bëri me dije se nuk i frikësohet aspak asaj.

“Unë jam luftëtar i UÇK-së. Secili që ka luftuar nën emblemën e kësaj ushtrie nuk frikësohet nga asnjë situatë, e as edhe nga kjo Gjykatë. Mendoj se ka raste kur ne e kemi dëshmuar si bashkëpunohet me drejtësinë ndërkombëtare, por ky institucion është padrejtësi për luftën e UÇK-së”, përfundoi Haradinaj. /Telegrafi/