Ujësjellësi Rajonal “Prishtina” ka njoftuar se është vështirësuar furnizmi me ujë të pijshëm për shkak të vërshimeve dhe turbullimit të ujit në kanalin “Ibër Lepenc”, nga i cili furnizohet me ujë fabrika për përpunimin e ujit.

“Për shkak të reshjeve atmosferike ditëve të fundit, gjendja e ujit të papërpunuar në liqe dhe në kanalin e “Ibër Lepencit” është përkeqësuar sërish, për shkak të ngritjes së turbullirës, gjë që nuk po lejon të trajtojmë ujë të pijshëm në kushte optimale”, thuhet në njoftimin nga KRU”Prishtina” sh.a.

Sipas njoftimit, gjendja më e papërshtatshme është në fabrikën e trajtimit të ujit në FPU-Drenas, që ujin primar e merr nga kanali i Ibrit në Bivolak.

“Ky kanal, me gjatësi prej 50 km, është i pambrojtur nga ujërat sipërfaqësore gjatë reshjeve, duke ndikuar që turbullira në këtë kanal të jetë në vlera të larta e që na pamundëson trajtimin e ujit të pijshëm, për shkak që shfaqen probleme teknologjike dhe papastërti. Situatë të ngjashme gjatë ditës së sotme kemi edhe në Lipjan (fshatin-Torinë), për shkak të përmbytjeve si dhe në Fushë Kosovë/Miradi e Ulët, poashtu për shkak të përmbytjeve nga lumi Sitnica”, thuhet në njoftim po ashtu.

“Në të gjitha zonat e tjera të shërbimit vazhdon furnizim stabil me ujë të pijshëm, por jemi duke e monitoruar në vazhdimësi kualitetin e ujit , për shkak të situates së krijuar së fundmi”, thuhet në njoftimin e Ujësjellësit “Prishtina”, i cili kërkon mirëkuptim nga konsumatorët e zonave të prekura nga vërshimet.