Pesë të akuzuar për mashtrim me vota dolën sot në gjykatore për t’u përballur me akuzat e Prokurorisë por shqyrtimi gjyqësor nuk u mbajt për shkak të mungesës së dy të akuzuarve.

Dy nga të akuzuarit nuk ishin të pranishëm në seancën e sotme. Gjykatësi Vehbi Kashtanjeva tha se ka prova që njëri ndër të akuzuarit, Sh. Krasniqi, nuk është ftuar me ftesë të rregullt, ndërsa i akuzuari tjetër A. Gashi nuk e ka arsyetuar mungesën e tij në seancë.

Për arsye se nuk janë plotësuar kushtet për mbajtjen e seancës gjyqësore, gjyqtari Kashtanjeva seancën tjetër e caktoi për 25 prill.

Pesë të pandehurit akuzohen nga Prokuroria Themelore në Prishtinë për mashtrim me vota.

Ata akuzohen se gjatë ditës së mbajtjes së zgjedhjeve për Kuvendin e Republikës së Kosovës të vitit 2010 në qendrën e votimit në shkollën fillore në Janjevë të Komunës së Lipjanit, i pandehuri Sh. Krasniqi, në cilësinë e kryesuesit, dhe katër anëtarët tjerë Z. Bytyqi, F. Gashi, A.Gashi e F.Gashi, në bashkëkryerje, kanë falsifikuar rezultatet e zgjedhjeve, shkruan kallxo.

Gjithnjë sipas aktakuzës, të pandehurit me rastin e numërimit të fletëvotimeve u kishin kanë hequr disa vota disa kandidatëve të subjekteve politike duke ua shtuar disa kandidatëve të tjerë me çka dyshohet se kanë ndryshuar rezultatin e zgjedhjeve në këtë qendër votimi./Kallxo.com