Qetësia u prish në qendër të Lipjanit, të mërkurën mbrëma. Forcat policore u ftuan tek ndërtesa “Budakova”.
Një 52-vjeçar u arrestua, pasi dyshohet se ka sulmuar seksualisht një të mitur. E mitura është fqinje e të arrestuarit, familjarët e të cilës nuk kanë dashtë të prononcohen para kamerës.

Prapa kamerës, nëna e viktimës tha se i dyshuari ia sulmoi vajzën seksualisht.

Për të prangosurin fqinjët tjerë kanë fjalë të mira. Sipas tyre, ai kishte probleme shëndetësore dhe ishte i dashur me fëmijët.

Zëdhënësi i Policisë rajonale të Prishtinës, Agron Borovci, tha për Klan Kosovën se rasti është raportuar si lëndim trupor, por meqë njëri nga prindërit e vajzës ka deklaruar se vajza u ngacmua seksualisht, atëherë rasti është marrë më me seriozitet.

Të shtunën të dyshuarit iu është shqiptua masa e paraburgimit prej 30 ditësh.