Ministri i Arsimit Shkencës dhe Teknologjisë ,Arsim Bajrami, sot vizitoi disa nga shkollat të mesme të Kosovës ku u takua me nxënësit dhe mësimdhënsit ku diskutuan për maturën Shtetërore.

Ai tha se provimi i maturës nuk do të jetë pengesë për regjistrim në institucionet e arsimit të lartë.

Shkrimi i tij i plotë:

“Sot kam vizituar shkollat “Sami Frashëri” në Prishtinë, “Ismail Luma” në Lipjan dhe “Kuvendi i Arbërit” në Ferizaj, me ç’rast kam dëgjuar kërkesat e nxënësve dhe mësimdhënësve dhe kemi biseduar me nxënës për provimin e maturës shtetërore.
Së shpejti do të dërgohet në Kuvend, Ligji i rishikuar për Provimin e Maturës Shtetërore. Ndryshimet në këtë projektligj do të mundësojnë që provimi i maturës të mos jetë pengesë për regjistrim në institucionet e arsimit të lartë, meqenëse tani standardi i ri që do të propozojmë do të jetë kriteri i arritshmërisë dhe do të hiqet pragu i kalueshmërisë. Pranimi i studentëve në institucionet e arsimit të lartë do të bëhet në bazë të rezultateve të arritura, ku 30% do të jetë suksesi gjatë shkollimit të mesëm dhe të lartë, 40% suksesi në provimin e maturës shtetërore, dhe 30% në vlerësimin e brendshëm të njësive akademike”./Infodirekt.tv/