Një grup i të rinjve nga Komuna e Mitrovicës, për nderë të Festës së Fiter Bajramit kanë filluar aktivitetin humanitar “Zgjatma Dorën”, që si qëllim ka mbledhjen e fondeve që do të shkonin në ndihmë të familjeve të cilat jetojnë në kushte të rënda sociale.

Ky grup i të rinjve është pritur nga nënkryetari komunës, Safet Kamberi, me ç’rast është biseduar për mundësinë që këtë aktivitet ta mbështes edhe komuna.

Besnik Hoti, koordinator i projektit e njoftoi nënkryetarin Kamberi me ecurinë e aktivitetit.

Ai tha se kanë marrë këtë iniciativë që për disa ditë do të mbajnë aktivitete në vende të ndryshme për të mbledhur mjete materiale, apo gjera të tjera për t’iu dalë në ndihmë shumë familjeve të varfra në Komunën e Mitrovicës.

“Ne kërkojmë edhe nga komuna që të mbështesë këtë aktivitet, pasi besojmë se është një ndihmesë për këto familje, sidomos me rastin e festës së Bajramit”, tha ai.

Nënkryetari i Komunës, Safet Kamberi, theksoi se këto aktivitete që i dalin në ndihmë shoqërisë janë të mirëseardhura.

Ai tha se Komuna do të ndihmoj në bazë të mundësive reale që ka.

Mbështetje për këtë aktivitet ka dhënë edhe Mensur Beqiri, drejtor për Integrime Evropiane dhe Mirëqenie Sociale (DIEMS).

Ai tha se në bazë të planit të punës, DIEMS bënë shpërndarjen e pakove ushqimore për familjet me vështirësi socio-ekonomike.