Tiger Woods hyn në telashe. Ish-numri 1 i botës në sportin e golfit, u arrestua më jug të Floridas me akuzën e drejtimit të mjetit nën ndikimin e alkoolit dhe substancave narkotike.
Ishte vetë policia e Palm Beach County që e ka konfirmuar këtë lajm nëpërmjet një raporti të publikuar online.
Sipas policisë lokale, Woods që ka fituar 14 tituj në turnetë madhorë në karrierën e tij u arrestua në orën 7:18 të mëngjesit të së hënës, për t’u liruar disa orë më vonë.
Tiger Woods reagoi pas arrestimit duke deklaruar se i gjithë faji ishte përzierja e medikamenteve që ai i merr me recetë mjekësore për të kërkuar më pas falje duke marrë përgjegjësinë për veprimet e tij.
“Dua që publiku të dijë se në alkooli nuk ka aspak lidhje me atë çfarë ndodhi”, tha Woods. “Gjithçka ishte një reaksion i shkaktuar nga një përzierje medikamentesh.
Nuk arrita të kuptoja ndikimin që patën tek unë këto medikamente. Do bëj gjithçka mundem që kjo të mos ndodhë më”.
Nuk është hera e parë që Woods pushton faqet e para të gazetave për ngjarje që nuk kanë aspak lidhje me golfin.
Në vitin 2009, jeta e tij private u trondit pasi u zbuluan disa lidhje të tij jashtëmartesore që shtynë bashkëshorten e tij Elin Nordegren që të kërkojë divorcin.
Pas kësaj për Woods gjërat nuk u përmirësuan përkundrazi shkuan edhe më keq teksa humbi disa kontrata me sponsorët. /Express/
