Në orët e vona të mbrëmjes së 17 majit, një person i moshës 29-vjeçare ka mbetur i vdekur nga të shtënat me armë zjarri në fshatin Ratkoc të Rahovecit.
Policia nga rajoni i Gjakovës ka bërë të ditur për Gazetën Express se personi i cili u vra mbrëmë është i moshës 29-vjeçare dhe ka prejardhje nga komuna e Gjilanit. H.J. është personi, i cili u vra mbrëmë në fshatin Ratkoc të komunës së Rahovecit.
Motivet e vrasjes ende nuk dihen. Viktima nga të shtënat kishte marrë lëndime të dukshme në pjesën e kokës. Vdekja e tij është konstatuar nga mjeku kujdestar i spitalit rajonal “Isa Grezda” në Gjakovë.
Ndërkohë që trupi i pajetë i viktimës tashmë është dërguar për në obduksion.
Policia nga rajoni i Gjakovës konfirmon se është duke i kryer ekzaminimet në vendin e ngjarjes, ndërkohë që ende nuk dihen motivet e vrasjes së 29-vjeçarit.
“Është kryer ekzaminimi i vendit të ngjarjes dhe rasti po hetohet nga Sektori Rajonal për Hetime nga Drejtoria Rajonale e Policisë në Gjakovë, në bashkëpunim me Prokurorinë Shtetit në Gjakovë. Policia e Kosovës me njësitë e saj relevante është duke punuar intensivisht në zbardhjen e rrethanave të këtij rasti dhe identifikimin e viktimës dhe personave të dyshuar të mundshëm”, thuhet në komunikatën e policisë. /GazetaExpress/


