Galatasaray është gjobitur me 50.000 euro nga UEFA, pas rrëmujës së tifozëve në humbjen nga Arsenali në kuadër të Ligës së Kampionëve.

Klubi turk pësoi me rezultat 4-1 në Emirates më 1 tetor, në një ndeshje që u pengua nga fishekzjarrët e hedhura në fushë.

Edhe ulëset në pjesën e mysafirëve ishin dëmtuar nga tifozët e Galatasarayt dhe tash klubi i tyre ka pësuar.

Arsenali, nga ana tjetër, është akuzuar për organizim jo të mirë të ndeshjes, mirëpo UEFA nuk e ka dënuar dhe i ka mbyllur procedurat disiplinore ndaj klubit anglez.

Edhe Baseli është dënuar me 40.000 euro për “hedhje të objekteve” gjatë ndeshjes kundër Liverpoolit, ndërsa Feyenoordi dhe Standard Liege janë gjobitur me nga 15.000, respektivisht 17.000 euro për incidentet në kuadër të ndeshjes së Europa League.

Federata e Andorrës është gjobitur me 10.000 euro për organizimin jo të mirë të ndeshjes kundër Uellsit, federata e të cilit do të paguajë 5.000 euro dënim për hyrjen e tifozëve në fushë.

Ndërkohë, në ditët në vijim do të presim vendimin e UEFA-s rreth incidentit në ndeshjen ndërmjet Serbisë dhe Shqipërisë. /Telegrafi/