Në KlanKosova Direkt të emisionit Ora e Fundit është diskutuar për sondazhin e Organizatës Joqeveritare Asociacioni Rinor për të Drejtat e Njeriut – YAHR, sipas të cilit 73 përqind e qytetarëve në Lipjan mendojnë se komuna e tyre është e korruptuar.

Bekim Krasniqi nga kjo organizatë ka treguar se si e kanë zhvilluar këtë hulumtim i cili tregon për nivelin e korrupsionit atje.

“Ne kemi bërë një hulumtim për korrupsionin, kemi intervistuar 51 respodentë dhe kemi nxjerrë rezultate se 73 përqind mendojnë se ekziston korrupsioni në nivelin lokal”.

Por këto rezultate i kanë kundërshtuar zyrtarët e komunës në Lipjan, duke thënë se nuk janë kredibile dhe të sakta.

“Ky është një perceptim i gabuar. Nuk mund te themi se me 51 respodentë të intervistuar ka korrupsion në komunë”, ka thënë Shkëlzen Hajdini, drejtori për Buxhet dhe Financa në Lipjan.

“Ne nuk e kemi marrë seriozisht këtë hulumtim, ne kemi dashtë të argumentojmë se kjo është një tendencë për tu manipuluar dhe për të dhënë një mesazh të gabuar për komunën e Lipjanit”.

Por Krasniqi ka thënë se organizata e tyre ka kredibilitet dhe se nuk janë të manipuluar nga ndonjë parti politike.

Ndërsa Hajdini tregoi se komuna e Lipjanit është duke punuar gjatë gjithë kohës për të luftuar korrupsionin atje.