AnalysisFC e ka bërë një hulumtim për të analizuar rivalitetin mes klubeve të Premierligës, përmes pyetjes “Cilin klub të Premierligës e urreni më së shumti?”. Nga ky studim u zbulua se Manchester Unitedi është klubi më i urryer, ndërsa ai më i pëlqyer është Leicester City.
“Djajtë e Kuq”, të cilët kanë arritur ta fitojnë titullin e Premierligës plot 13 herë në epokën e re të kësaj gare. Tifozët e gjithsej 13 klubeve rivale në ligën angleze i votuan ata si një ndër tre klubet që i urrejnë më së shumti, transmeton Gazeta Express.
Ndërsa, Leicesteri është votuar si klubi më së paku i urryer nga rivalët e klubit në Premierligë. Ata e kishin fituar titullin e kësaj gare në sezonin 2015/2016 dhe suksesi i tyre shpeshherë cilësohet si një ndër historitë më të bukura kohëve të fundit të futbollit.
Liverpooli është klubi i dytë më i urryer në Premierligë, sipas këtij studimi. Në vend të tretë pozicionohet Tottenhami, ndërsa Chelsea pozicionohet në vendin e katërt, të përcjellë nga klubi tjetër nga Londra, Arsenali.
Manchester City mund ta ketë fituar gjatë kohës së fundit titullin e Premierligës, megjithatë ky klub ende nuk ka arritur ta marrë urrejtjen e tifozëve të klubeve të tjera, pasi që është në pozitën e dhjetë. /Gazeta Express/
