Mesfushori i Arsenalit, Mesut Ozil, ka thënë se atij nuk i intereson çfarë thonë kritikët e tij pasi që e kupton se jo çdokujt mund t’i pëlqej stili i lojës së tij.
Mesfushori gjerman dhe origjinë turke është bërë një figurë mjaft kontroverse gjatë periudhës së tij në Arsenal, pasi që paraqitjet e tij i kanë sjellë sa tifozë aq edhe kritikë, transmeton Gazeta Express.
Përkundër që ai ishte kampion bote me Gjermaninë dhe e ka dëshmuar talentin e tij plot herë në ndeshjet më të mëdha, ai kritikohet shpeshherë për paraqitjet e tij. Megjithatë, ai e kupton se jo të gjithëve mund t’iu pëlqejë.
“Shikoni, unë e di se ka shumë njerëz që nuk iu pëlqej. Ky është një fakt i jetës. Por, për mua, është e rëndësishme çfarë mendojnë dhe çfarë më thonë njerëzit e afërt me mia”, ka thënë Ozil para ndeshjes së Evropa Ligës.
“Jashtë këtij rrethi, s’më intereson çfarë thonë njerëzit. Nuk ka aspak ndikim te unë. Nëse trajneri ose njerëzit e afërt me mia më thonë: ‘Mesut, duhet ta bësh këtë ose atë’, atëherë unë i dëgjoj, e marr këtë këshillë dhe punoj për këtë gjë”. /Gazeta Express/
