Portieri i Real Madridit, Keylor Navas, ka lënë të kuptohet se ai mund të largohet nga Real Madridi gjatë afatit kalimtar të janarit përmes një postimi në llogarinë e tij në Instagram, ku duket se po përshëndetet me Real Madridit.
Portieri nga Kosta Rika duket se e konfirmoi largimin e tij nga gjiganti madrilen në postimin e tij të fundit, ku mbi një foto me fanellën e Real Madridi, ai shënoi: “Faleminderit për gjithçka”, transmeton Gazeta Express.
Edhe para se Navas ta publikonte këtë postim në llogarinë e tij në Instagram, spekulimet për largimin e tij nga Santiago Bernabeu kishin filluar, pasi që sipas SPORT, Arsenali kishte bërë një ofertë prej 16 milionë eurosh për 32-vjeçarin.
Mediat italiane raportojnë se edhe Roma e ka shprehur interesimin për t’i siguruar shërbimet e portierit të Real Madridit.
Navas ka qenë lojtar i “Los Blancos” që nga viti 2014, si dhe ishte zgjedhja e parë për pozitën e portierit në këtë klub gjatë viteve 2015-2018. Ai e ndihmoi klubin e tij ta fitonte tri herë radhazi Ligën e Kampionëve.
Megjithatë, pas transferimit të Thibaut Courtois gjatë afatit kalimtar të verës, Navas e humbi vendin në formacionin e parë të “Los Blancos” dhe Santiago Solari e ka bërë të qartë se Navas do të aktivizohet vetëm në ndeshjet e Copa del Rey. /Gazeta Express/
