Situata e Philippe Coutinhos në Barcelonë nuk është aspak e kënaqshme. Braziliani beson se ai nuk mund të qëndrojë më në Camp Nou, ku u transferua për të qenë yll, por roli i tij në skuadër është zvogëluar gjithmonë e më shumë.
Mediat spanjolle raportojnë se nga të gjithë në Barcelonë, vetëm trajneri Ernesto Valverde ka ende besim te ai, edhe pse Coutinho është duke e humbur edhe këtë besim për shkak të paraqitjeve të tij, transmeton Gazeta Express.
Coutinho nuk ka arritur të përshtatet te ekipi i tij i ri dhe për këtë arsye ai dëshiron të largohet nga Barcelona dhe ta harrojë këtë periudhë të errët në karrierën e tij. Fishkëllimat nga disa tifozë në Camp Nou, në ndeshjen kundër Rayo Vallecanos, kanë bërë që Coutinho të vendosë të largohet.
E përditshmja angleze, The Mirror, pretendon se Coutinho e ka paralajmëruar Manchester Unitedit se dëshiron të largohet nga Camp Nou. Braziliani dëshiron të kthehet në Premierligë, ku më herët ishte treguar shumë i suksesshëm me Liverpoolin.
E njëjta gazetë raporton se Coutinho tashmë ka biseduar me disa futbollistë të Manchester Unitedit dhe u ka thënë atyre se ai mund të transferohet në Old Trafford për 115 milionë euro.
Braziliani e dëshiron shumë kthimin në Angli, veçanërisht pasi Ousmane Dembele e zuri vendin e tij në formacionin e parë të “Blaugranëve”. Ai do të preferonte kthimin në Liverpool, mirëpo beson që kjo gjë nuk është e mundur. /Gazeta Express/
