Liderja e La Ligës, Barcelona, do ta presë rivalin e vjetër, Real Madridin, sonte në orën 21:00, në Camp Nou, për ndeshjen e parë gjysmëfinale të Kupës së Mbretit.
Skuadra katalonase ka triumfuar në këtë garë për katër sezonet e fundit radhazi dhe ka dështuar të kualifikohet në finale vetëm një herë në tetë vjetët e fundit, transmeton Gazeta Express.
Real Madridi do të kërkojë hakmarrje pas disfatës me rezultat 5:1 që pësoi ndaj “Blaugranëve” në tetor të vitit të kaluar, në La Liga. Kjo disfatë përfundoi me shkarkimin e Julen Lopeteguit nga pozita e trajnerit.
Që të dy skuadrat vuajnë nga lëndimet për këtë ndeshje, mirëpo beteja mes tyre prapëseprapë pritet të jetë emocionuese për shkak të talentit që posedojnë në skuadër të dy klubet.
Uebsajti ndërkombëtar i futbollit, Goal.com, e ka zgjedhur formacionin me 11 lojtarët më të mirë të Real Madridit dhe Barcelonës, ku marrin pjesë katër lojtarë të “Los Blancos” dhe shtatë të katalonasve.