Qendërmbrojtësi italian i Juventusit, Leonardo Bonucci, pretendon se ai kishte ofertë nga Real Madridit gjatë afatit kalimtar të verës së kaluar, mirëpo ai e kishte refuzuar këtë ofertë pasi që donte të kthehet në Juventus.
Bonucci ishte transferuar gjatë verës së vitit 2017 në Milan nga Juventusi. Kuqezinjtë ia kishin dhënë menjëherë atij shiritin e kapitenit, por, verën e kaluar, italiani dëshiroi të kthehet përsëri te “Zonja e Vjetër” pasi që nuk ishte i lumtur në Milan, transmeton Gazeta Express.
Italiani e ka pranuar se ai e kishte mundësinë ta përjetonte La Ligën, ku Real Madridi i kishte bërë një ofertë për ta blerë. Por, Bonucci ishte i bindur se dëshironte vetëm të kthehej në Juventus.
“A është e vërtetë që e refuzova Real Madridin? Po, është. Real Madridi më shikoi dhe kjo më bëri të ndihem mjaft shumë krenar, si dhe isha shumë i kënaqur që isha i kërkuar nga ta”, ka zbuluar Bonucci.
“Kjo do të thotë që unë kam punuar mirë gjatë vjetëve të fundit. Megjithatë, thirrja nga Juventusi dhe kthimi në atë që unë e ndiej si shtëpi të zemrës sime bëri që unë të vendosja se Juventusi ishte opsioni më i mirë për mua”.
Bonucci tani do të bëhet gati për ndeshjen kundër rivalit të Real Madridit, Atletico Madridit, pasi që Juventusi do të ndeshet me ta në fazën e 1/8 të finales së Ligës së Kampionëve, të mërkurën.
Juventusi për herë të fundit e ka fituar titullin e Ligës së Kampionëve në sezonin 1995/96, në finalen e së cilës u ndeshën me Ajaxin. Por, që nga atëherë, “Zonja e Vjetër” ka pësuar disfatë në pesë finale të kësaj gare. /Gazeta Express/


