Thirrja e ISIS’it në shqip për të përgjakur festat e fundvitit ka alarmuar autoritetet kosovare. Policia e Kosovës ka kërkuar nga Komuna e Prishtinës vendosjen e mbrojtëseve të betonit në hyrje të shesheve kryesore të kryeqytetit.
Komuna e Prishtinës ka vendosur mbrojtëse të betonit në hyrje të shesheve. Zyrtarë të Komunës kanë thënë për Radion Evropa e Lirë se kjo kërkesë ka ardhur nga Policia e Kosovës për të rritur nivelin e sigurisë gjatë festave të fundvitit.
Pas përfundimit të festave këto mbrojtëse prej betoni do të largohen dhe gjithçka do të kthehet si më parë.
Megjithatë, disa qytetarë kanë thënë se Kosova nuk është e rrezikuar nga sulmet terroriste dhe se nuk duhet të ngjallet frikë.
Mbyllja për vetura e hyrjeve të shesheve me mbrojtëse të betonit është bërë edhe në qytete të ndryshme evropiane.
“Ti ke kohë të mjaftueshme për t’u pajisur me makinë për t’i shtypur turmat e tyre, ose për të blerë një thikë për t’i goditur ata, ose për të mbushur pushkën tënde me armatim”, ky është kërcënimi që agjencia e lajmeve e ISIS-it në shqip, me afro 400 ndjekës, ka shpërndarë te pasuesit e saj, duke kërkuar përgjakje të festave të fundvitit.
“E nëse këto nuk pranohen nga shpirti yt, hyn në turmën e tyre dhe bërtit: “Allahu është më i Madhi”, thuhet në këtë kërcenim të cilin Gazeta Express e ka raportuar më 4 dhjetor.