Sipas asaj që raportojnë mediat italiane, për shkak të problemeve të vazhdueshme fizike të Sime Vrsaljkos, zikaltrit nuk do të ushtrojnë të drejtën e blerjes së tij në merkaton e verës, transmeton Gazeta Express.

Madje, raportohet se mbrojtësi kroat është hequr edhe nga lista me 25 lojtarë, që Interi ka dorëzuar në Federatën Italiane, pas mbylljes së merkatos së dimrit, çka do të thotë se kroati nuk mund të luajë në kampionat me zikaltrit.

Në vendin e tij, në listë është shtuar mbrojtësi anësor portugez, Cedric Soares, i cili ka ardhur para pak ditësh në Milano, me formulën e huazimit me të drejtë blerjeje për 11 milionë euro nga Southampton, gjithmonë nëse do të bindë me performancat e tij, në të kundërtën, do të ketë fatin e Vrsaljkos.

Vrsaljko është duke shikuar mundësinë dhe po konsultohet me ekipe mjekësore, për një ndërhyrjeje kirurgjikale.

Një intervenim i tillë, do ta lë atë për disa muaj jashtë fushe, i cili më pas pritet të rikthehet te Atletico Madridi, për të nisur rikuperimin.

27-vjecari ka bërë vetëm 13 paraqitje për Interin në të gjitha garat. Nuk ka shënuar asnjë gol, teksa ka asistuar dy herë për shokët e skuadrës. /Gazeta Express