Shoqata e Futbollit të Anglisë (FA) ka folur me sulmuesin e Liverpoolit, Cody Gakpo, në lidhje me mesazhin në fanellën që ai mbante veshur gjatë festimeve të titullit të Premier League nga Reds të dielën.

Pasi mposhti Tottenhamin 5-1 të dielën, Liverpooli fitoi titullin e 20-të të Ligës Premier në historinë e tyre dhe herën e dytë që kur Liga Premier luhet në formatin e saj aktual.

Një festë e zjarrtë pasoi në Anfield, dhe lojtarët shfrytëzuan rastin për të festuar me shokët e tyre të ekipit, familjet dhe për të nxjerrë në pah mesazhe të ndryshme, nga flamujt e vendeve të tyre deri te ato fetare. Ishte ky mesazh nga Cody Gakpo që çoi në një paralajmërim nga udhëheqësit e ligës.

Shoqata e Futbollit (FA) i ka shkruar Gakpos për shkak se ka mbajtur një mesazh që shkruan: “Unë i përkas Jezusit”.

Letra theksonte se “Shoqata e Futbollit ndalon sloganet fetare në veshje, në atlete futbolli dhe pajisje tjera”.

Gakpo e ngriti fillimisht fanellën pasi shënoi një gol kundër Tottenhamit për të dërguar një mesazh, dhe më pas e hoqi fanellën dhe pozoi gjatë festimeve pas ndeshjes. /Telegrafi/